TSIARO
Sento sisa no atao
Raha mitodika mijery ny lasa
Fa tsy eo intsony
Kôlônely Richard RATSIMANDRAVA
Tsiaro mamy sy mangidy
Mifamototra amin'ny lasa
Nomamefy ny tadidy
Tadidy
Hisintona ny lasa
Manao hoe :
"Miverena RATSIMANDRAVA
Hamerina ny lamina
Sy ny hasin'ny FOKONOLONA"
Ny ho avy mantsy visavisa
Ankamantatra... tanisa...
nosoratan'i Danielle Maryse RATSIMANDRAVA
Febroary 2011
TSY ADINOINA
Na dia eo aza ny fisarahana
Tsy adinoina ireo fotoana mamy niarahana
Misoritra ato an-tsaiko sy ato am-poko
Ireo tsiaro mampisento ka tsy foiko
Ny fahaizanao mahandro sakafo
Raha vidina mety ho lafo
Nisy endrika, tsiro ary hanitra
Fahasoavana avy amin'Andriamanitra
Ny "clafoutis" fanaonao
Ny "canard aux navets" tsy adinoko
Teo am-bavako foana ny hoe "ny ahy ampiako"
Nomenao toro-hevitra feno fahendrena
Ny fanarahana azy ireo ekena
Hoy ianao zava-dehibe ny fianarana
Tsy azo lavina fa antoky ny fivelarana
Teo ny fitiavanao mamaky boky sy gazety
Fikolokoloin-tsaina hitako tena mety
Nampirisihanao koa aho tamin'ny famakiana
Marina ilay teninao hoe "mahaliana"
Mbola kely aho voan'ny tifoidra
Ny fitiavanao tsy nifindra
Teo foana ianao nampahery
Ary tsy nampahafantarinao izany hoe irery
Mipetraka an-tsaiko koa
Ireo asa soa an-tsitrapo
Teo amin'ny Fiangonana sy fiaraha-monina
Marina daholo izany fa tsy noforonina
Vehivavy nanampy olona
Vehivavy tsy natahotra tolona
Vehivavy tsy nanambony tena
Vehivavy nanetry tena
Raha amiko dia tonga lafatra
Teo anilanao izaho nahatsiaro sambatra
Maryse RANDRIANASOLO
Marsa 2011
ILAY VONINKAZO
Voninkazo kanto
Nivelatra sy namerovero
Mama
Nisandrahaka
Nandritra ny fotoana
Niarahany tamin'ny fianakaviana
Mitoetra ary mamy
Ireo zava-bitany rehetra
Ka tsy ho levona
nosoratan'i Danielle Maryse RATSIMANDRAVA
Febroary 2011
MAMA
FOLO TAONA SAHADY IZAY
Folo taona sahady izay
Mandeha ny fotoana
Banga eo amin'ny fiainanay ianao
*Betsaka ny olana
Nolalovanay
Satria tsy teo intsony ianao
Niainga tamin'ny
Tsy nisy izahay
Tamin'ny fahalasanao
Tsy nataonay nahakivy
Anefa ny fahasahiranana
Fa vao mainka nampitraka
Nijoro izahay
Nanarina
Namboatra ny fiainana manontolo
Betsaka ny zavatra vitanao
Taminay
Tsy ho adinoina mandrakizay
Lova tsara ho anay
Zanaka
Ny fikarakarana rehetra nataonao
Matoky izahay
Amin'ny fitantanan'Andriamanitra
Isan'andro
Ankehitriny
Misokatra tsikelikely
Ny masoandro
Masoandro mibaliaka
Izay manazava ny sainay
Tamin'ny fitiavanao anay
nosoratan'i Danielle Maryse RATSIMANDRAVA
Febroary 2011
